Prentsa-oharrak: Bi buruk batek baino hobeto pentsatzen al dute ikasgelan? BCBLk ikasgelan kolaboratzeak dituen onura metakognitiboak adierazi ditu

• 500 haur inguruk parte hartu dute ikasturte honetan Gasteizko Carmelitas Sagrado Corazón ikastetxean kokatutako laborategiko ikerketetan.
• Ikerketa baten helburua izan da ulertzea elkarreragin sozialak nola eragiten duen ikaskuntzan, arrazoitzeko gaitasunean zehazki.

(Gasteizen, 2026ko maiatzaren 11n).- Bi buruk batek baino hobeto pentsatzen al dute ikasgelan? Basque Center on Cognition Brain and Language (BCBL) ikerketa zentroaren ikerketa berri batek erakutsi du ikasgelan elkarlanean aritzea funtsezkoa izan daitekeela haurren konfiantza areagotzeko.

Ikerketa BCBLko JuniorLab laborategian egin da, Gasteizko Carmelitas Sagrado Corazón Ikastetxean. 2025-2026 ikasturte honetan, Haur eta Lehen Hezkuntzako 500 bat haurrek parte hartu dute ikastetxeko ikerketetan, metakognizioa edo eleaniztasuna bezalako arloetan sakontzeko.

Horietako baten helburua izan da ulertzea nola hartzen dituzten haurrek erabakiak elkarrekin, eta nola eragiten duen elkarreragin sozialak beren pertzepzioetan duten konfiantzan. 8 eta 9 urte bitarteko eta 10 eta 11 urte bitarteko ikasleek osatutako bikoteek hartu zuten parte ikerketan.

“Partaidetza-jarduera batean, irudi anbiguo bat ezkerrerantz ala eskuinerantz okertuta zegoen erabaki behar zuten. Lehenik eta behin, banaka erantzuten zuten, eta 1 eta 6 gozoki bitartean jokatuz adierazten zuten beren konfiantza-maila. Ondoren, bikotearekin eztabaidatzen zituzten erantzunak, eta erabaki komun batera iristen ziren. Emaitzek erakusten digute baterako erabakiak banakakoak baino zehatzagoak izan zirela; eta ados ez zeudenean, bikotearen erantzunari konfiantza handiagoz jarraitu zioten kasuen % 92an.”, azaldu du Francisca Campos Matiasek, BCBLko “Consciencia” taldeko ikertzaileak.

Aurkikuntza horiek iradokitzen dute, adituaren esanetan, “ikasgelan elkarlanean aritzeak arrazoibide metakognitiboa hobetzen duela, nork bere pentsamenduari buruz pentsatzeko txikitatik dugun gaitasuna”. Gainera, galdera berriak irekitzen dituzte, hezkuntza-testuinguruetan horrelako prozesuak sustatzeko moduari buruz.

Amaiera Ekitaldia

Francisca Campos Matiasek bere lanaren emaitzak aurkeztuko ditu asteazken honetan, maiatzaren 13an, Carmelitas Sagrado Corazán ikastetxean, JuniorLab-en ikastaroaren amaierako ekitaldian.

Instalazioak abangoardiako neuroirudi-teknikekin egokituta daude, eta hizkuntza-jabekuntzarekin zerikusia duten prozesu neurokognitiboetan sakontzen dute ikastetxeko ikasleen laguntzarekin, hezkuntza-sistemari prestakuntza-estrategiak optimizatuko dituzten tresnak emateko erronkarekin.

Horrez gain, Clara Martin Ikerbasqueko irakasle eta “Hizkuntza eta Elebitasuna” taldeko liderrak ere parte hartuko du. Eleaniztasunari buruzko funtsezko gaiak jorratu eta hitz egiten dugunean garun eleanitzak hizkuntza ezberdinak erabiltzeko duen gaitasunari buruz hitz egingo du.

“Ikusiko dugu hizkuntza guztiak etengabe koaktibatuta daudela garun eleanitzean, eta hori nola frogatu den ikerketa esperimentaletan. Gainera, hiztun eleanitzek, besteak koaktibatu arren, nahi duten hizkuntzan hitz egitea nola lortzen duten aztertuko dugu”, nabarmendu du Martin doktoreak.

Horretarako, neurozientzialariak entzuleekin proba egingo du eta adibide zehatzak jarriko ditu, non jendeak irudiak izendatu beharko dituen hizkuntza batean edo bestean.

“Gaztelaniaz, euskaraz eta ingelesez izen bera duten objektuak eta hizkuntza bakoitzean izen ezberdina duten beste batzuk erakutsiko ditut. Ikusiko dugu lehenengoak azkarrago izendatzen direla, eta horrek erakusten du hizkuntzak koaktibatuta daudela”, gehitu du adituak.

Hitzaldian, BCBLk hirueletasunari buruz egin berri duen ikerketa-lerro bat ere aztertuko da, garun eleaniztunean zein hizkuntzek interferitzen duten gehien beren artean jakiteko egin dena.

JuniorLab-i buruz

BCBLren eta Gasteizko Carmelitas Sagrado Corazón ikastetxearen arteko harremana 2011n finkatu zen, JuniorLab sortu zenean, hizkuntzarekin lotutako prozesu neurokognitiboak zientifikoki aztertzeko laborategia. Esperientzia aitzindaria da Europa mailan, eta hezkuntzan aplikatutako neurozientziaren aurrerapena sustatzea du helburu. JuniorLab haurren mekanismo kognitiboak aztertzeko erreferentzia-zentro bihurtu da, eta, horretarako, ikerketa neurozientifikoak egiteko azken belaunaldiko teknikez hornitutako hainbat gela ditu.

BCBLri buruz

Basque Center on Cognition, Brain and Language Donostian egoitza duen diziplina arteko nazioarteko ikerketa zentroa da, kognizioa, garuna eta hizkuntza aztertzen dituena. Eusko Jaurlaritzak bultzatzen du, Euskadin zientzia eta ikerketa sustatzeko helburuarekin. Gainera, Ikerbasque, Innobasque, Gipuzkoako Foru Aldundia eta Euskal Herriko Unibertsitatea (EHU) ditu kide.

Informazio gehiago eta elkarrizketak:

Unai Macias

unai@guk.eus

690 212 067