Prentsa-oharrak: Neurozientziaren etorkizuna Donostian bilduko da, garunak eta adimen artifizialak azentuei nola erantzuten dieten aztertzeko

• BCBLk Europako HUM.AI.N-ACCENT proiektuaren esparruan, ikertzaile-belaunaldi berri baten topaketa antolatu du Donostian. EBk hiru milioi euro baino gehiago jarri ditu horretarako.
• Ekimenak atzerriko azentua duen hizketaren mekanismo neurokognitiboak aztertzen ditu pertsonen arteko elkarreraginetan, AA tresnak baliatuz.
• Urriaren 22an, osteguna, galdera-erantzun saio interaktibo bat egingo da Bidasoa Taproom tabernan.

(Donostia, 2026ko urriaren 20a).- Basque Center on Cognition, Brain and Language (BCBL) (BCBL) ikerketa zentroak HUM.AI.N-ACCENT ―Europar Batasunak hiru milioi euro baino gehiagorekin finantzatutako Doktoretza Sare handinahi bat― nazioarteko hirugarren formakuntza ekitaldia hartuko du astelehen honetatik (urriak 19) urriaren 30era bitartean. Ekimenak Europako laborategiak, Estatu Batuetako eta Kanadako zentroak eta akademikoak ez diren erakundeak biltzen ditu, neurozientziaren etorkizuna prestatzeko helburuz.

Zehazki, proiektuak nazioarteko 13 doktoregairen kontratazio zein formakuntza espezializatura bideratzen ditu funtsak, neurozientzian, psikolinguistikan eta adimen artifizialean espezialisten belaunaldi berri bat bultzatzeko. Partzuergo transnazional horren barruan, BCBLk lidergoa hartzen du: ikertzaile gazteetako baten tesia tutoretzen du, sareko beste erakunde batzuetako akademikoen egonaldiak hartzen ditu eta Europako ekosistema zientifikorako prestakuntza egoitza gisa jarduten du.

Hori guztia, gainera, giza garunak atzerriko azentua duen hizketa nola hauteman eta prozesatzen duen argitzera bideratuta dago, bai pertsonen arteko komunikazioan, bai Adimen Artifizialeko sistemekiko interakzioan.

 «HUM.AI.N-ACCENTen mami zientifikoa jatorrizkoa ez den hizkuntza bat entzuten edo ekoizten dugunean aktibatzen den ezagutza neurokognitibo eta sozialean sakontzean datza», azaldu du Clara Martinek, BCBLko Ikerbasque irakasleak.

Esparru teorikotik haratago, ekimenak itzulera pragmatiko eta soziala lortu nahi du: integrazio linguistikoa erraztea eta ahots laguntzaile eta sistema adimendunen garapena optimizatzea, azentuen aniztasuna zehaztasunez hauteman dezaten.

«Garunak atzerriko azentuei nola erantzuten dien eta nola egokitzen zaien ulertzeak neurozientziaren mugak zabaltzeaz gain, funtsezkoa da komunikazio oztopoak eraitsi eta ahots teknologien garapenean alborapenak saihesteko. Gure helburua zera da: eragin erreala sortzea pertsonek elkarren artean eta ingurune digitalekin duten interakzioan», gaineratu du Clara Martinek.

Dibulgazio irekia herritarrentzat

Donostian antolatutako lehen aste intentsiboan, zentroko instalazioetan diseinu esperimentalera, ikerketa planen formulaziora eta neuroirudi teknika aurreratuen erabilerara sartzeko tailer praktikoetara bideratutako saioak daude. Zientzia irekiko politikaren parte gisa, jardunaldi teorikoak eta prestakuntzakoak modu telematikoan irekitzen zaizkie kanpoko ikertzaileei.

Gainera, ezagutza hori gizarteari helarazteko asmoz, programak publiko guztiei zuzendutako dibulgazio eta partaidetza ekintza batekin osatzen du jarduera teknikoa. Urriaren 22an, osteguna, 19:30etik 21:00etara, Donostiako Bidasoa Taproom espazioak «Hizkuntzak eta azentuak» ekimen interaktiboa hartuko du.

«Galdera-erantzun joko formatuan diseinatutako gaua da. Bertaratzen direnek denbora errealean parte hartu ahal izango dute beren telefono mugikorretatik, garunaren funtzionamenduari, hizkuntzen aniztasunari eta azentuen prozesamenduari lotutako gaiei erantzunez», nabarmendu du BCBLko ikertzaileak.

Jarduerak formatu dinamiko eta hurbila izango du eta gai-multzo bakoitzaren ondoren azalpenak emango ditu nazioarteko ikerketa-taldeak, eta galdera irekiak egiteko aukera ere egongo da. Ahalik eta irisgarritasun handiena lortzeko, ekitaldia hirueleduna izango da, euskaraz, gaztelaniaz eta ingelesez.

Proiektuaren prestakuntza-programa urriaren azken astera arte luzatuko da, psikolinguistikari aplikatutako estatistikaren inguruko ikastaro monografiko batekin. Ikastaro hori Bodo Winter irakasleak emango du, arlo honetan nazioarteko erreferente dena, Euskadik hizkuntzaren ikerketan talentu zientifikoa erakartzeko duen posizioa sendotuz.

BCBLri buruz

Basque Center on Cognition, Brain and Language nazioarteko diziplinarteko ikerketa zentroa da. Donostian kokatuta dagoen zentro honek, Eusko Jaurlaritzaren laguntzarekin, kognizioa, burmuina eta hizkuntza ikertzen ditu Euskadin zientzia eta ikerketa sustatze aldera. BCBL zentroa Zientzia, Teknologia eta Berrikuntzaren Euskal Sarearen (ZTBES) barruan dago eta Ikerbasque, Innobasque, Gipuzkoako Aldundia eta Euskal Herriko Unibertsitatea (UPV/EHU) dira haren kideak.

Informazio gehiago eta elkarrizketak:

Unai Macias

unai@guk.eus

690 212 067