Aktualitatea: BCBLk neurofeedback protokolo berriak garatuko ditu kontzientzia emozionala erregulatzeko

• David Sotok, ikerketa-zentroko Ikerbasque irakasleak, 500 000 €jaso ditu biomedikuntzako eta osasuneko proiektuetarako «la Caixa» Fundazioaren laguntzen azken deialdian.
• Ekimenaren ardatza alexitimia izango da, hau da, 10 pertsonatik batek duen ezaugarria, eta bere bereizgarri nagusia emozioak identifikatzeko, deskribatzeko eta prozesatzeko ezintasun iraunkorra da.

(Donostia, 2026ko urriaren 15a).- David Sotok, Ikerbasque irakasle eta Basque Center on Cognition, Brain and Language (BCBL) ikerketa-zentroko «Kontzientzia» taldeko buruak 500 000 € jaso ditu biomedikuntza eta osasun proiektuetarako «la Caixa» Fundazioaren laguntzen azken deialdian.

BCBLren proiektu hautatuak alexitimian jartzen du arreta. Alexitimia nortasunaren ezaugarri bat da, 10 pertsonatik batek pairatzen duena, eta bere ezaugarri nagusia emozioak identifikatzeko, deskribatzeko, erregulatzeko eta adierazteko ezintasun edo zailtasun iraunkorra da.

«Alexitimia depresioa, antsietatea edo autismoa bezalako patologiekin lotzen da. Hala ere, azpian dauden garuneko mekanismoak oraindik ezezagunak dira, eta esku-hartze gutxi daude kontzientzia emozionala hobetzeko», azaldu du David Sotok.

Egoera horren aurrean, ikerketaren helburuak honako hauek dira: garunak emozioak alexitimia maila desberdinak dituzten pertsonengan nola irudikatzen dituen aztertzea eta neurofeedback teknika eta Adimen Artifiziala (AA) uztartzen dituzten protokolo berriak garatzea, emozioen garuneko irudikapena modulatzeko.

Neurofeedback teknika bidezko estrategia

David Sotok gidatutako proiektuak hainbat arlotan espezializatutako profesional talde bat du, hala nola neurozientzian, psikologian, osasun mentalean eta AAko teknologietan, garuneko eta ordenagailuko interfazeen bidez hainbat egoera emozionali lotutako garun-jarduera ereduak denbora errealean identifikatzeko.

Gerora, eredu horiek parte-hartzaileak neurofeedback teknikaren bidez entrenatzeko erabiliko dira. Teknika ez inbaditzailea da, eta garuna bere jarduera neurala erregulatzen trebatzen du, emozioen prozesamendua hobetzeko xedez.

Azkenik, BCBLko taldeak metodologia hori eramangarria eta irisgarria izatea nola lortu daitekeen aztertu nahi du, alexitimia duten pertsonei psikoterapiaren osagarri diren eta kontzientzia eta autoerregulazio emozionala hobetzen laguntzen duten esku-hartze pertsonalizatuak emateko.

Euskal erakundea Osasun Ikerketarako Deialdiaren bederatzigarren edizioaren onuradun izan diren Espainia eta Portugalgo 32 erakundeetako bat da.

Fundazioaren laguntza horiek biomedikuntzaren eta osasunaren erronka handiei heltzen dieten oinarrizko ikerketak, ikerketa klinikoak eta translazionalak babesten dituzte, hainbat arlotan: neurozientziak, gaixotasun kardiobaskularrak eta metabolikoak, onkologia, gaixotasun infekziosoak eta arlo horietakoren batean errazten duten teknologiak.

BCBLri buruz

Basque Center on Cognition, Brain and Language nazioarteko diziplinarteko ikerketa zentroa da. Donostian kokatuta dagoen zentro honek, Eusko Jaurlaritzaren laguntzarekin, kognizioa, burmuina eta hizkuntza ikertzen ditu Euskadin zientzia eta ikerketa sustatze aldera. BCBL zentroa Zientzia, Teknologia eta Berrikuntzaren Euskal Sarearen (ZTBES) barruan dago eta Ikerbasque, Innobasque, Gipuzkoako Aldundia eta Euskal Herriko Unibertsitatea (UPV/EHU) dira haren kideak.

Informazio gehiago eta elkarrizketak:

Unai Macias

unai@guk.eus

690 212 067